Намская детская модельная библиотека

Улуустааҕы Үрүҥ Тунах ыһыах күн  Намнааҕы оҕо модельнай библиотеката ССРС култууратын туйгуна, СӨ култууратын үтүөлээх үлэһитэ, СӨ Суруйааччыларын сойууһун чилиэнэ, Нам улууһун, Маймаҕа уонна Ленскэй нэһилиэктэр Ытык киһитэ, “Отуу уотун” литературнай түмсүү чилиэнэ, мелодист, кыраайы үөрэтээччи, оҕо суруйааччыта Бубякин Иван Афанасьевич-Чөҥөчөх хоһооннорунан “Чөҥөчөхтүү чоргуйуоҕуҥ”, үгэ уонна чабырҕах ааҕыытын күрэҕин тэрийэн ыыттыбыт. Бу күрэхпит дьүүллүүр сүбэтигэр үлэлээтилэр Шапошникова Алтыына Юлиевна, П.П.Ядрихинскай-Бэдьээлэ аатынан Олоҥхо дьиэтин методиһа, Николаева Анна Евгеньевна, Улуустааҕы культура уонна духовнай сайдыы управлениетын специалиһа, Афанасьева Надежда Алексеевна, Намнааҕы оҕо модельнай библиотекатын үлэһитэ.

“Чөҥөчөхтүү чоргуйуоҕуҥ” үгэ уонна чабырҕах ааҕыытын күрэҕин спонсордарынан Иван Афанасьевич аймахтара Хатын-Арыы нэһилиэгиттэн Григорий Егорович Семенов, Егор Егорович Гоголев, оҕолоро уонна Иван Афанасьевич төрүттээбит Намнааҕы оҕо искусстватын оскуолата. Махтал буолуохтун биһиги спонсордарбытыгар!

Дьүүллүүр сүбэ быһаарыытынан 1 бөлөххө кыайыылааҕынан таҕыстылар: «Чоргуй-Чобуо” — чабырҕахсыттар  бөлөхтөрө,   бэлэмнэнии группа оҕолоро «Кустук «уһуйаан, Партизан нэһилиэгэ, салайааччы Григорьева Ульяна Семеновна.       

2 бөлөххө — » Умсулҕан» фольклорнай студията, «Сайдыы» оҕо айымньытын дьиэтэ, Хомустаах 1-кы нэһилиэгэ  салайааччы Аргунова Александра Дмитрьевна.

Биирдиилээн толорооччуларга 1 бөлөххө 1 миэстэни ылла — Саввин Дьулустаан,  И.Д. Винокурова-Чагылган аатынан Намнаа5ы алын сүһүөх оскуолата, салайааччы Тамара Степановна Уваровская, 2 миэстэ – 3 саастаах кырачаан Милена Макарова Нам нэһилиэгэ, Протопопова Диана Хамаҕатта нэһилиэгэ. 2 бөлөххө – 1 Хомустаахтан Уйгун Мамаев 1 миэстэни ылыан ылла.

3 миэстэ – “Сулусчаан” уһуйаан иитиллээччитэ Тускулаана Попова уонна Айхал Пахомов таҕыстылар.

Үгэни толорууга 5 саастаах Диана Протопопова Хамаҕатта «Тускул» оҕо уһуйаанын иитиллээччитэ бастакы миэстэни ылан Намнааҕы оҕо искусстватын оскуолатын уонна бубякиннар аймах анал бириистэрин хаһаайкатынан буолла.

Бары кыттыбыт оҕолорго туоһу суруктар, өйдөбүнньүк бэлэхтэри Иван Афанасьевич Бубякин  бэйэтэ туттартаан оҕолор өссө үөрдүлэр, астыннылар.

Бу ыытыллыбыт “Чөҥөчөхтүү чоргуйуоҕуҥ” үгэ уонна чабырҕах ааҕыытын күрэҕэ норуот фольклорун оҕолорго иҥэрэн, оҕо кэрэни, үчүгэйи таба көрөн, айар иэйии, дьулусханын таба тутан бары өттүнэн сайдыылаах буола улаатарыгар олук ууруо диэн эрэллээхпит.

Күндү оҕолор! Cаха тылынан уус-уран айымньыны чабырҕаҕы, үгэни сөбүлээн ааҕын. Сахалыы уус тыллаах, дириҥ мындыр толкуйдаах, киэҥ көҕүстээх, сатамньылаах дьон буола улаатаргытыгар баҕарабыт!