Намская детская модельная библиотека

Олунньу ый 13 күнүгэр төрөөбүт тыл уонна сурук-бичик күнүгэр үгэскэ кубулуйбут «Таптыыр сахам тылынан…» өрөспүүбүлүкэтээҕи дьыктаан быйыл ыытыллынна.

Дьыктааны Саха Өрөспүүбүлүкэтин Национальнай бибилэтиэкэтин «Оҕо аһыллар, ааҕар киинэ», өрөспүүбүлүкэ улуустарын оҕо бибилэтиэкэлэрэ, салаалара «Бары ааҕабыт» бырайыак чэрчитинэн тэрийэн ыытыллар. Дьыктаан сүрүн сыалынан өрөспүүбүлүкэ үөрэнээччилэрэ төрөөбүт тылынан ыраастык, литературнай нуормаҕа толору эппиэттиир, уус-уран, суруга-бичигэ таба, тупсаҕай буоларыгар үлэлэһии.

Быйыл өрөспүүбүлүкэ үрдүнэн оҕо бибилэтиэкэлэрин, салааларын үлэһиттэрэ дьыктааны миэстэтигэр, куйаар ситимин нөҥүө тэрийэн, биир күҥҥэ, биир кэмҥэ 5892 алын уонна орто сүһүөх кылаас үөрэнээччилэрэ саха тылыгар уонна литератураҕа билиилэрин тургуттулар. Үөрэнээччилэр 9 тест быһыытынан бэриллибит ыйытыыларга хоруйдаатылар, бүтэһик сорудахха бэриллибит тиэмэлэргэ ис хоһооннорун, суолталарын арыйан, өйтөн суруйдулар.

Дьүүллүүр сүбэ үөрэнээччилэр үлэлэрин үс бөлөҕүнэн арааран, тус-туспа сыаналаан кыайыылаахтары ааттаата.

3-4 кылаас үөрэнээччилэрин ортолоругар:

I үрдэл – П. Каролина, Хаҥалас улууһун Үөдэй орто оскуолатын 4 кылааһын үөрэнээччитэ;

II үрдэл – Николаев Альберт, И. Д. Винокуров-Чаҕылҕан аатынан Нам алын сүһүөх оскуолатын 4 кылааһын үөрэнээччитэ;

III үрдэл – В. Даяна, Г. С. Донской аатынан Бүлүү куорат 2№-дээх орто оскуолатын 3 кылааһын үөрэнээччитэ.

5-6 кылаас үөрэнээччилэрин ортолоругар:

I үрдэл – О. Арчылаана, Хаҥалас улууһун С. П. Барашков аатынан Хачыкаат орто оскуолататын 5 кылааһын үөрэнээччитэ;

II үрдэл – Кириллина Айыллаана, Н. С. Охлопков аатынан Нам улуустааҕы гимназиятын 6 кылааһын үөрэнээччитэ;

III үрдэл – Б. Сайаана, Үөһээ Бүлүү улууһун Н. К. Седалищев-Дьүөгэ Ааныстыырап аатынан Кэнтик орто оскуолатын 6 кылааһын үөрэнээччитэ.

7-8 кылаас үөрэнээччилэрин ортолоругар:

I үрдэл – Л. Марат, Хаҥалас улууһун С. П. Барашков аатынан Хачыкаат орто оскуолататын 7 кылааһын үөрэнээччитэ;

II үрдэл – М. Ирина, Үөһээ Бүлүү улууһун Т. И. Петров аатынан Өргүөт орто оскуолатын 8 кылааһын үөрэнээччитэ;

III үрдэл – В. Айгыына, Анаабыр улууһун Сааскылаах орто оскуолатын 7 кылааһын үөрэнээччитэ.

«Быйыл, «Таптыыр сахам тылынан…» дьыктааны Горнай, Таатта, Сунтаар, Томпо, Хаҥалас, Үөһээ Бүлүү, Кэбээйи, Булун, Уус Алдан, Усуйаана, Анаабыр, Өймөкөөн, Нам, Чурапчы, Ньурба, Мэҥэ Хаҥалас, Бүлүү улуустарыгар, Дьокуускай куоракка ыытылынна. Оҕо бибилэтиэкэлэрин, салааларын үлэһиттэрэ миэстэтигэр тэрийэн, бэрибиэркэлээн, бөлөхтөр кыайыылаах кыттааччыларын үлэлэрин ыыттылар. Оҕолор үлэлэрин дьүүллүүр сүбэ бэрибиэркэлээтэ, сыаналаата. Дьыктаан кыттыылаахтарыгар, кыайыылаахтарыгар Добун уонна туоһу суруктар туттарыллыахтара», – диэн үллэһиннэ өрөспүүбүлүкэтээҕи дьыктаан тэрийээччитэ Диана Бырдака.

Оҕо аһыллар, ааҕар киинин аатыттан дьыктааны тэрийсибит өрөспүүбүлүкэ оҕо бибилэтиэкэлэригэр, салааларыгар, саха тылын уонна литературатын учууталларыгар махталбытын тиэрдэбит!